بسم الله الرحمن الرحيم
عام دراسي جديد و سعيد و خفيف يارب ..
ياسرعها هالإجازة :( + من زمان عنكم هنا من رمضان ! اشتقتلكم ❤
« الحياة الجامعية هي بوابتك لمستقبلك الخاص بك »
تتوقعونها فعلًا كذا ؟ بالضبط هي كذا ، و فعلًا استشعرت هالجملة و حسيت بمعناها لما دخلت الجامعة و لاحظت الفرق بين الحياة المدرسيّة و الحياة الجامعية ..
في هالتدوينة بحكيكم عن أبسط النقاط و الأمور و التغيرات اللي ممكن تتطرأ على حياتكم بعد انتقالكم من الحياة المدرسيّة للحياة الجامعية .. التغيّر و التغيير سنة من سنن الحياة ، ولو ماكان فيه تغيّر كان تجمدت الحياة من حولنا وتحجرت وتوقفت وصارت مملة و مافيه أي لذّة ! والتغيرات ياأما تكون للأسوأ أو للأفضل وهذا يرجع للشخص وتقبله للتغيير و كيفية تعامله مع هالتغيّرات .. تدوينتي ممكن تميل للطلاب و الطالبات المستجدين في الجامعة ، لكن الكلام للعموم وبيفيد الجميع إن شاءالله ..
الحياة الجامعية ، من ضمن هالتغيّرات اللي تأتي لحياتك فإما أنك تستغل هالمرحلة لتطوير نفسك والسعي لمستقبلك أو أنك تبدأ في الإهمال و الاستهتار و اللهو عن تحقيق انجازاتك ! الحياة الجامعية تعطيك المسؤولية الكاملة في التصرف .. في حضورك للقاعة الدراسية و في تأخيرك و مشاركتك وتفاعلك و احضار واجباتك !
عكس الدراسة اللي ممكن تلقى المعلم والمعلمة يلحقون وراك وينتظرونك تسلّم واجباتك و يحثونك كثير و ينصحونك ! في الجامعة الكل بيشيل نفسه من حياتك و بيعطيك كامل المسؤولية في ذلك .. ولك الحرية في التصرف ! وأنا أشوف هالنقطة على كثر أنها مسؤولية صعبه إلا أن فيها استقلالية و راحة بدون تدخل أي شخص في قراراتك .
//
عكس الدراسة اللي ممكن تلقى المعلم والمعلمة يلحقون وراك وينتظرونك تسلّم واجباتك و يحثونك كثير و ينصحونك ! في الجامعة الكل بيشيل نفسه من حياتك و بيعطيك كامل المسؤولية في ذلك .. ولك الحرية في التصرف ! وأنا أشوف هالنقطة على كثر أنها مسؤولية صعبه إلا أن فيها استقلالية و راحة بدون تدخل أي شخص في قراراتك .
//
- قبل دخولكم للجامعة حاولوا تكتبون وتدونون وتتذكرون جميع إنجازاتكم السابقة اللي حققتوها في الماضي ، لأن تذكر الإنجازات و لذتها يذكركم أنه ( أنت أنجزت هالشي بتقدر على غيره ) ! انشغالكم بالحاضر و تحقيق غاياتكم ممكن يلهيكم عن هالإنجازات الثمينة اللي حققتوها ! بس احفظوها لاتنسونها دبسوها بقلوبكم حتى لو كانت انجازات تافهه ، مثلًا ( حفظ قصيدة بالأدب كاملة ، حل مسألة صعبه باختبار الرياضيات ) بيعيينكم على انجاز أكبر من ذلك في الجامعة .
- كلنا واجهتنا تحديات و إحباطات في حياتنا الماضية ، تعديناها و كملنا حياتنا .. و من وعيك أنك تكون تعرف هالتحديات و الإحباطات اللي واجهتك وكيف قدرت تتغلب عليها ، اذا مرّ عليك بالفترة الجامعية دكتور " علّه " مثلًا ومعروف انه ماينجح بسهوله ! تذكر معلم بالمدرسة كان شديد و تحديت نفسك و جبت درجة كويسة عنده ! تذكرك لتحدياتك اللي تغلبت عليها يسهل لك التغلب على المشاكل اللي بتواجهك بالجامعة .. بتكون عندك حلول قريبه و سهله و متمرن انت عليها وتطبقها بكل ثقه ، وتذكروا دائمًا بالجامعة مافيه « بخلي أمي تجي تتفاهم معها ، بخلي أبوي يكلم يقنعه » مافيه إلا أنت وقدراتك !
- بالحياة عمومًا و بالحياة الجامعية خصوصًا بيمرون عليكم أشخاص يأثرون فيكم و في قراراتكم ويقنعونكم ويعطونكم آرائهم ، الأشخاص المؤثرون نوعين : ١ ) إيجابيين ٢ ) سلبيين .. الأشخاص المؤثرون إيجابيًا تمسك فيهم وتعلق فيهم بيديك و رجولك ، والأشخاص اللي يعطونك تأثير سلبي ينقسمون قسمين : الأول / أشخاص مهمين بحياتك و سلبيين ، هذولي إلغ تأثيرهم السلبي عليك و حاول تقوي نفسك و أذنك لين مايأثر فيك حكيهم مثل أختك مثلًا مهم وجودها بحياتك بس تأثيرها سلبي لذلك مانسمعه ولانستقبله ..! الثاني / أشخاص غير مهمين و سلبيين ، هذولي من الأفضل نلغيهم بكبرهم من حياتنا ونلغي تأثيرهم *مع السلامة* مو ناقصين سلبيين زيادة ووجودهم غير مهم أبدًا .
- في الحياة الجامعية من المهم أنك تعطي كل أمر حجمه الحقيقي دون مبالغة أو استهانة ، يعني لـما يُعرف عن أستاذ معين أنه صارم و شديد في الحضور والغياب يجب عليك أنك تنتبه جيدًا لهالمسألة وتحرص أنك تكون دقيق في حضورك و ماتتغيب ، لاتستهين بحجمه الحقيقي عشان ماتنصدم بالنتيجه ( حرمان من المادة مثلاًٍ ) ! وفي المقابل لاتبالغ ، يعني من شدة حرصك على رضا الدكتور عنك يصيبك صمت قاتل فماتشارك ولاتتفاعل في القاعة أبدًا خوفًا منه ! هذا غلط .. أعطي الأشياء و الأمور حجمها الحقيقي بتوازن !
- في بداية العام حددوا نتيجة معينة تبون تحققونها ، من خلال تحديد هالنتيجة تقدرون توصلون لاستراتيجية معينة و خطوات واضحة تمشون عليها لتحقيق نتيجتكم اللي تبونها ، مثلًا : تبغين تحققين ( A+ ) في منهج معين ، ابدي بوضع استراتيجية وخطوات واضحة تتبعينها وتلتزمين بها عشان تحققين نتيجتك ( مراجعه اسبوعيه ، تسليم الواجبات في الوقت المحدد ، مشاركة وتفاعل مع الاستاذة في القاعة ، تسليم انشطة الترم ..... ) وهكذا مع كل نتيجة ترغب بها .
- الحياة الجامعية مرحلة مختلفه ، بوابة لحياة كبيرة و صناعة لمستقبلك الخاص فيك ، لذلك كل فترة حدد ٣ أهداف تحققها في كل جانب من جوانب حياتك ، بس قبل تحدد الأهداف تذكر أن الأهداف مب بسيطة ! الأهداف من شروطها أنها كبيرة و واقعيه وقابلة للتحقيق و طبيعي تحتاج لخطوات للوصول لها ، مثال لهدف ( أن أكون مستمع جيد ) بعدها تضع الخطوات ( أركز بنظري عالمتحدث ، اترك كل مابيدي عشان أنتبه له ، ماأقاطعه في حديثه ، ..... ) هذي خطوات تنقلك للهدف ، و بعد كل هدف تنجح فيه تستمر عليه وتنتقل لغيره .. بعد فترة بتحس بتحسن في ذاتك و حياتك وأنك فعلًا متغير و متطور و متحسّن و حياتك الجامعية صنعت اختلاف و غيرتك حتى بجوانب حياتك الغير علمية .. بكرة تتخرج من الجامعة و أنت تحس بنقلة عظيمة في كل جوانب حياتك .
- أنت / أنتي أول داعم لنفسك في الجامعة ، لأن الجامعة مافيها معلمة تمدحك على كل إجابة ولا فيها ستيكرات ولا تصحيح دفاتر يكتب بنهايته ثناء من المعلمة .. أنت المسؤول عن تقدير نفسك ومعرفتك كامل المعرفة ، لذلك كل فترة احرص أنك تسأل نفسك ( أنا مين؟ وش أستحق درجة ؟ هل أستحق هالتخصص ؟ ) أسئلتك لنفسك بتعينك للوصول لفهم ذاتك و معرفة حجمها و تذكر تقديرك لذاتك يجعل الآخرين يقدرونك .
- « يا سعادة خبريني وين أرضك ياسعادة؟ » بالضبط كذا ! بالجامعة بتصادقون كثير و و تتعرفون على أشخاص أكثر ، لكن الشخص الواعي هو القادر على تصنيف الأشخاص ومعرفة من يجالس ومين يصاحب ومين يزامل فقط ! فيه أشخاص نسميهم " مصادر البهجة و السعادة في حياتنا " و عشان نحدد الموضوع بتكون " حياتنا الجامعية " هالمصادر حافظوا عليهم احفظوهم بعقولكم و قلوبكم و خلوهم قريبين منكم ( فلان يسعدني دعمه ، فلانه تسعدني سواليفها ، فلان يسعدني حماسه لأفكاري ، فلانه أنبسط بالنقاش معها ..... ) تعرفك علي كمية لابأس بها من الأصدقاء يجعلك أكثر راحة بالجامعة و أكثر أمان و تلجأ لمن ترغب به في الوقت اللي تريده .. فمثلًا محتاج تضحك بتلقى لك جليس ، و أنتِ محتاجة بريك سواليف وساعة صدر عندك أشخاص معينيين و محتاجة بكرة انسانة تناقشينها بمسأله معينه بتسعدين بنقاشها ، تنوع الأصدقاء و تعددهم يسهل عليك ايجاد مصادر سعادتك لكن أنت المسؤول عن تصنيف الأشخاص و كيف يسعدونك؟ والمحظوظ من يجد صديق يجمع له غالب أنواع السعادات .
أتمنى لكم حياة جامعية مزهرة و سعيدة و مريحة ، و مُنجزة ،،
أي فكرة و اقتراح يتبادر لأذهانكم في تطوير وتنمية للمجتمع اقترحوا فيه لجامعتكم و انشبوا لين يتحقق :"
أي مشروع و حملة تحلمون يوم من الأيام أنها تكون واقعية بادروا بالسعي لها ..
- ❤ -
السلام عليكم ورحمة الله وبركاته
ردحذفيعطيكِ العافية على المجهود الي بذلتيه في سبيل تقديم هذه النصائح ، بطبيعة الحال مر علي أغلب ما ذكرتيه إن لم يكن كله لأنني كنت مستجدًّا السنة الماضية نصائح مفيدة وبأسلوب مميز جدًّا،
أود إضافة شيء واحد فقط إن سمحتي لي وهو نوع من الأصدقاء الذين قد تتعرف عليهم في الجامعه وهم أصدقاء المصلحة وللأسف الشديد هم موجودون بكثرة
عاصرتهم كثيرًا في سنتي الجامعية الأولى وسأبتعد عنهم تمامًا في الثانية، عندما يحتاجونك تراهم بجانبك وإن احتجتهم يديرون ظهورهم لك وكأنهم لا يعرفونك ابتعدوا عن هذا النوع أشد البعد... المعذرة عالإطالة وموفقة أختي :)
شكككككككككرا جزيلا تدوينة فوقتها ♥.♥
ردحذفكلام عقلاني وجميل ومقنع ، الله يسعدك وينولك مرادك
ردحذفتدوينه فوق الوصف شكرا كبيرة ياربى ،،،،،
ردحذفشكككككراا من الاعمتق هلى هذه النصائح ..لك فيض محبتي ♥♥جزيتي خيرا
ردحذفتدوينتك فادتني كثيييييييير بس مرررره متعبني التفكير في تخصصي للحين ما تخصصت و لا ادري وش ادخل الله ييسرها !! صديقاتي يقولون انو ما فيه تخصص مناسب ميه بالميه بس المشكلة اني ما لقيت حتى تخصص واحد كلهم ما حسيت براحه لهم مدري ليه ... نصيحتك ؟؟
ردحذفكلام سليييييم يعطيييييييك ألف عافية
ردحذفمآشآءالله عليكٌ " مبدعهة الله يوفقكٌ
ردحذفكلاممٌ اكثر منٌ رآئع , طريقتكٌ في الطرحُ
اشكركٌ ي بطلهة
أنحفرت بقلبي
ردحذفوبالمفضله كمان
دايم راح اتذكر كلامك هذا 💛